हिराकाजी श्रेष्ठं न्ह्यब्वयादीगु तिम्रो याद मिठाे बोल म्ये थौं लबिम मलय् छगू ज्याझ्वःया दथुइ सार्वजनिक जूगु दु । थुगु म्ये रोमा श्रेष्ठं हालादीगु खःसा म्येच्वमि, गीतकार,वरिष्ठ निर्देशक व संगीतकार प्रकाश सायामिं च्वयादीगु खः । थुगु म्येया संगीत संयोजक प्नविन बरैली खःसा संगीत संयोजन सुरेन्द्र बरैलीं यानादीगु दु । प्रकाश बरैलीं मिक्सिंग व मास्टरिङ यानादीगु खः ।
लुःजः इन्टरटेनमेन्टं निर्माण याःगु थुगु म्येया किपालुमि गौतम श्रेष्ठ खः । समाः बुद्धि लामा, सहनिर्देशक सुनिता श्रेष्ठ, पिरकल्कार, सम्पादक व निर्देशक लुःजः सिंह खः । ऋतु श्रेष्ठ व सोहित मानन्धरया मू भुमिका दुगु थुगु म्येय् प्रस्तोता हिराकाजी श्रेष्ठ व रोम श्रेष्ठं नं थःगु कलाकारिता बांलाक्क क्यनादीगु दु ।
म्ये च्वमि हिराकाजी श्रेष्ठं थःगु चिहाकःगु न्वचुइ थःगु जीवनी सफू संसारया लोकप्रियता अप्वया वःगु व उगु सफूपाखें मुंगु ध्यबा थःम्हं पोखरेली मिसा पुचःयात लःल्हाना वयाच्वनागु जानकारी बियादीगु खः । म्येहालामि रमा श्रेष्ठं निगूगु म्ये हालेगु अनुभव कनादिसें भविष्यय् मेमेगु नं म्ये हालेगु ग्वसाः दुगु खँ कनादिल ।
घोस्ट पब्लिशिंगया नायः कमल ढकालं संसार सफूया बारे छुं छुं खँ न्यंकादीगु खः ।
म्येच्वमि प्रकाश सायामिं म्येहालामि रोमा श्रेष्ठ व हिराकाजी श्रेष्ठयात च्वछाया दीगुलिं व निगूगु म्येया जिम्मेवारी लःल्हानादीगुलिं सुभाय् देछानादीगु खः ।उगु ज्याझ्वलय् वरिष्ठ साहित्य समालोचक रमेशानन्द वैद्यं म्येया शब्द ल्यज्यायात कयाः चिहाकःगु न्वचू न्ह्यब्वयादीगु खः ।
सकारात्मक बिचाः दुम्ह समाज सेवी कर्ण र्ग्रुप अफ होटल्सया संस्थापक अध्यक्ष कर्ण शाक्यं थुगु म्येयात बांलाःगु जक मखु उत्कृष्ट जूगु धासें प्रशंसा यानादीगु खः । नेशनल बैंकया कार्यकारी गभर्नर दीपेन्द्र पुरुष ढकालं निर्देशक व कलाकार जोडीया बांलाःगु ज्याया प्रशंसा यासें मेपिं कलाकार रोमा श्रेष्ठ व हिराकाजी श्रेष्ठया चिचीधंगु खँयात ध्यानय् तयाः बांलाःगु ज्या याना वना च्वनेत नं निर्देशक सिंहयात प्रोत्साहन बियादीगु खः । म्येहालामि व संगीतकःमि शैलेश श्रेष्ठं म्येया बांलाःगु प्रस्तुति व सकसितं भिंतुना देछाना दीगु खः । ज्याझ्वःया अन्तय् सम्पादक, परिकल्पनाकार नापं निर्देशक लुः जः सिंहं थःगु ज्या व निर्देशन यात्राया बारे थःगु बिचा तयादीगु व भविष्यय् थःपिंसं अझ अप्वः सहकार्य यायेगु खँ कनादीगु खः ।
