लु; जः इन्टरटेन्टमेन्टया संकिपा नभ्यया अफिसियल ट्रेलर सार्वजनिक जूगु दु । थुगु टिजर फाल्गुन १४ गते शिवरात्रीया दिं सार्वजनिक याःगु खः । फाल्गुणया अन्तिमय् संकिपाया पोस्टर सार्वजनिक जुइधुंकाः थ्वहे संकिपाया अफिसियल ट्रेलर चैत्र १ गते बहनी ९ बजे लुः जः इन्टरटेन्टमेन्ट युट्युब च्यानलय् सार्वजनिक याःगु खः ।
संकिपाया ट्रेलर ३ मिनेट ९ सेकेण्डया दु । ट्रेलर ३ मिनेट ताःहाकः जूसां नं आकर्षक व मनमोहक खनेदु ।
ताः ई लिपा नायिका आशिष्मा नकर्मीं फिल्मय् सशक्त कमब्याक याःगु खनेदु । थुगु ट्रेलरय् अभिनेता नकर्मीया नापनापं अभिनेता प्रसन्नगोपालया अभिनय नं उलि हे प्रभावशाली प्रभाव लाकूगु क्यनातःगु दु । प्रसन्न गोपाली छम्ह कलाकार जक मखु, न्हापा न्हापा रोमियो मुना, जैरा, रेसम फिलिली थेंज्याःगु संकिपा दयेकूम्ह संकिपा निर्माता नं खः ।
थुगु ट्रेलरय् कलाकार विकास न्यौपानेया बांलागु ज्या क्यनातःगु दुसां थुकी संक्षिप्त झलक जक क्यनातःगु दु । संकिपाय् अभिनेता विकास न्यौपानें बिस्कं हे कथंया रोल म्हिताच्वंगु खनेदु ।
अभिनेत्री प्रेक्षा अधिकारीयात चीहाकःगु, बांलाःगु लुकय् खनेदूगु दु । नायिका अधिकारी नब्यां संकिपा स्वयां नं कान्तिपुर टेलिभिजनया सिरियल “कलेज” मार्फत डेब्यु याःगु खः । लिपा कान्तिपुर टेलिभिजनया यक्कोसिया यःगु शर्ट मुभि “कथा प्रेमका”य् बांलाःगु अभिनय लिपा निर्देशक संगीता श्रेष्ठया बाखं संकिपा “कथा काठमाडौं”य् आयुषमान देशराजलिसे खनेदत ।
संकिपाया बाखं व निर्देशन लु : जः सिंह व विप्लव आर पोखरेलया खः ।लु:ज: सिंह थ्व हे संकिपाया निर्माता, सम्पादक व छायांकार नं खः ।
संकिपाया ट्रेलर तसकं आकर्षक खनेदु । संकिपा नं उलि हे बांलाइ धकाः अनुमान यायेफइ ।
